هـــيــفــاء

انتهى خوفي بحمد لله بـ انخفاض بسيط بالضغط نتيجة فقر دم .. من كذا يوم وانا اعاني من خفقان بالقلب وزاد علي  بعد الصيام وصار ضغط في راسي من الجبهة الين نهاية رقبتي .. واول ماجاى في بالي يكون ضغط .. لأنه وراثي للأسف من  الجهتين ..!! وحالتي حالة وكنت خايفة اروح لمستوصف وانصدم بالامراض الي بتطلع لي .. لكن الحمدلله خلصت كبسولات فيروجلوبين ب 12 ممتازة وعلى مدح البنات بعد مازرت عمنا قوقل .. انها عكس كبسولات الحديد الثانية ماتجيب الغثيان او الاعراض المزعجة الثانية..  استخدمها لمدة شهر .. والدكتورة علشان تطمني تقولي تعالي بكره وبعد وبعد بعده علشان تقيسي الضغط :) اهم شي لاتفكرين وتشغلين نفسك ..!!

قرقيعان العام لولد اخوي .. بدري صح  وبما انه اول قرقيعان نسويه .. فـ كان بالبداية قرقيعان شوي تحول لحفل ميلاد وكيكة وشموع .. سبحان الله ههههه بالبداية لازم زيارة لــ شارع السويلم .. لشراء اغراض القرقيعان ..وبعده زيارة لمحلات الملابس الشعبية  وبالمره نمر على محل الحلويات ندور حلويات قديمة بهذة المناسبة  وهذا لبسه والخاتم الي كارهته :( هنا القرقيعان في طور التحول لعيد ميلاد   وهذي الكيكة الرسمية الي كانت السبب في تحوله لعيد ميلاد ... الكيكة من مخابز هرفي لكن للأسف الكتابة واضح انها عربي وبالخط الخربوطي بعد :) عقبال السنة الجاية قرقيعانه مع اخته .. نتلافى الاخطاء ويطلع بشكل قرقيعان غير مهجن ..!!

يوم الخميس قررنا نطلع للبر من بعد امطار الاسبوع والسيول والجو الرايق .. فـ كان قرارنا نروح لوادي الحسي بعد العيينة الجو ممتاز صحيح بارد بالظل بس مع الشمس الجو روعة ..  وكالعادة قعدت اصور بس هالمرة بالايفون طالعه الصور واضحة وحلوه .. بعكس جوالي الثاني نوكيا :(  وماننسى بعض الناس عندهم امتحان ويذاكرون بالسيارة ... علوم طلع عيونهم ق1 نارنا ننتظر تجمر علشان نطبخ الغدا دجاج بالخضار على طريقة القصدير وعلى الجمر على طول  وباقي الصور عن الوادي والسيل الي مع الوقت صاير يقل الين يوصل لمستقره .. بس ماادري وين بصراحة هالمستقر :) الارض غرقانه بالامطار لدرجة تمشي على الارض تحسبه ثابتة شوي تحسها تتحرك تحتك وتخفس رجولك ... عرفت تكتيك الغرق بالشعبان الطين يجرك للأرض ويالله تقدر تطلع رجولك  عقبال الكانون ان شاء الله .. لقطاتي احترافية ونظرتي فنية بس ناقصني كاميرا احترافية هههههههه طبعاً لازم بعد ماتغرقت الشربات قررنا نشمسها على الحبل ق1 وفي الاخير صورة لضحايا السيول قدرت القطهم من بعيد ...

عــامٌ جــديـــدٌ قـــد أطــــلَّ وأقــبـــــلا ..........  أدعـــو الإلـ'ــه بـــأن يــكـون الأجـمـــلا امالي واحلامي وطموحاتي لهذة العام ليست بالكثيرة ولا القليلة .. انما هي انتظار سنين وعمر عسى الله  ان يحققها مع كل اشراقة شمس يوم جديد وان كان انتظري  مع كل شهر رمضان ان ينقل بي الحال من حال الى احسن حال لماذا رمضان دون غيره من الشهور .. لا اعلم  لعل الله يحقق لي ماتشتاق له نفسي من زواج ينتج عن ذرية تقر بها عيني ويريح به الله قلبي ويجمع به شملي  هذا ماارجوه هذا العام .. واستطيع ان تبوح به نفسي الآن .!! فـ احلامي كثيرة وليست كبيرة..!!

وادي الارطاوي .. خلف تمير .. زيارتنا كانت يوم الخميس طلعنا من البيت الساعة 9 صباحاً ورجعنا للبيت على اذان العشا الجو كان هواء بارد والشمس حارة .. المنطقة حلوه وهادية بدون زحمة ومضايقة  النفود كان بارد ورويان من الامطار يوم الاربعاء .. حتى لما تمشي يخفس النفود ويتشقق .. احلى شي لما تدفن رجولك بالنفود  بارد وممتع  طلعة تفتح النفس .. حتى تمير روعة منظمة ونظيفة هادية .. بس مافيها محلات وسوبر ماركت كبير .. هذا حسب ماشفنا على طريقنا مجد انبسط قده لعب وركض .. واول ماركب السيارة نوم X نوم :)

انتهيت من عمل البوك مارك .. عمل بسيط جدأ حصلت على المارك من موضوع في مكتبة الاقلاع ( اختفى ).. بدأت بهذه المجموعة كبداية حتى  اتلافى الاخطاء من المجموعة الثانية .. لأن هذه المجموعة كانت الاسوء من حيث الالون الطباعة .. الاولى علقت لها كرة الصوف pom pom   خلال الاسبوع الماضي بحث وتعلمت اعمل البوم بوم لعدم توفر الاداة الا في امازون  ووجدت اكثر من طريقة لكل حجم تقريباُ ثلاث طرق ان شاء الله راح اعرضها  البوك مارك الثاني تركته بدون تعليقة الا من فيونكة من الصوف وصمغتها حتى ماتتحرك .. اما الاخيرة افكر اتركها كما هي  مارك بوك ثاني .. من شلة المغضوب عليهم .. الوان الطباعة باهتة .. واخذتها تجربة وعجبتني وهنا بالكتاب .. الفكرة كانت بما ان الصورة عبارة عن بنت تقرأ لكتاب ومو واضح راسها .. على اساس يكون راسها كدش ( الـ pom pom ) طلع شكلها حلو وفنكي هنا واضح شكله وفكرته .. اقدر اقول عنه مآآآآره نآآيس :) شكله خارج الكتاب .. طبعاً والاكيد مو على حسب ماكنت ابغى والفكرة الاساسية .. بس العوض ولا القطيعة .!! هذي المجموعة الثانية .. المرضي عليه...

حبيت هالمرة اسرد الافلام الي تستحق تتم مشاهدتها على الاقل من وجهة نظري .. خصوصاً ان اغلبها حافظتها بالهارديسك  بدال مااتكلم عن كل فيلم على حدة .. وبدون سرد مفصلة .. انما كل فيلم بشكل موجز وبسيط  راح ابدأ افلام 2011   The Son of No One 2011 ترشيح الاول لهذا الفلم جريمة دراما تشويق .. بكيت بصراحة مع البطل وقصته والظروف الي عاشها وهو صغير والاحداث الي مرت على طفل فاقد ابويه ..  Unknown.2011 فيلم رائع .. جريمة غموض تشويق واثارة .. كالعادة مع بطلنا يكون في زيارة لاوربا واثناء خروجه من المطار تبدأ الاحداث الغريبة معه .. اولها فقدانه لذاكرته وتغير الاحداث من حوله حتى زوجته .. الحلو بالفيلم تعيش التشويق ولاتفكر تشتغل بأي شي على النت الين تعرف وش السالفة .!! Limitless.2011 كمان فيلم تشويق وإثارة .. فكرة الفيلم جديدة وغريبة .. وتتمنى تحصل معك وتغير واقعك ومستقبلك معاً :) Rise.of.The.Planet.of.The.Apes.2011 فيلم تشويق .. ممتع جداً تصور قدرة الحيوان على الاستقلال وحبه للحرية ورفضه القيود وحياة الاسر .. خصوصاً اذا كان يدخل في جيناته تطور...